後日係武打巨星李小龍嘅74歲冥壽，去咗洛杉磯定居嘅女兒李香凝，噚日專登返港出席官方Bruce Lee LLC授權喺尖沙嘴舉行嘅即溶飲品發佈會，前排李香凝為咗爹哋李小龍嘅版權問題，同叔叔李振輝對簿公堂，喺發佈會亦唔見李小龍啲兄弟姊妹現身，李香凝話：「我冇邀請，因為呢個產品係我設計嘅，所以我自己做番比較適合。」佢仲話：「我唔知道報道講啲不和係乜嘢，但我哋有見面嘅，不過唔係經常。」
下年搞大型活動
跟住又問李香凝有冇計劃喺爹哋生忌搞紀念活動？佢話會同屋企人度過：「今年同美國感恩節係同一日，但唔會特別慶祝，不過下年係父親75歲生日，到時會有啲大型啲嘅活動。」有冇擔心爹哋離開咗咁多年，仲用佢名義出產品，俾人話發死人財？李香凝微笑話：「唔擔心，唔會怕人哋點睇，我一直好努力宣揚父親嘅哲學同生命觀，大家睇佢嘅電影，見到佢件T恤，就會聯想到父親嘅哲學同理念。」
撰文：馮仁昭
