阿爺「皇恩浩蕩」，賞賜香港滬港通，點知市場反應極為冷淡。阿爺一轉身走去減息，咁就射個三分波，中港股市齊升，為滬港通護航味濃。本來由減息帶來嘅升浪，過幾日黨報又可能抽水，今次將免費飯送到香港嘴。在將來的歷史書上，恐怕會由滬港通領功。
減息助內房跑出，咁多隻入面，粵海置地（124）同埋招商局置地（978）可睇多幾眼。先講前者，廣東省早前推國企改革，如果粵置阿媽粵海控股成功整體上市，粵置作為阿媽地產旗艦，因應集團重組而獲注資，情節合理。
另外大家有眼見，同系粵海制革（1058）、廣南（1203）9月尾來升四、五成，但粵置升不足一成。重組概念，加埋減息咁實際利好消息，應該到追落後時間。至於招商局置地，股價殘咗一段時間，今次減息後，值得重新望下。
集團上半年條數雖然唔靚，但第三季合同銷售總額23.6億元（人民幣．下同），條數靚過第二季，按季大升54%。首9個月合同銷售額50.4億元，約佔全年100億元目標一半。管理層早前都講過，第三季後有更多資源可賣，有信心可以完成全年銷售目標。咁意味集團第四季會急起直追，加埋減息消息推波助瀾下，隻股有雙重光環。兩股市賬率唔夠一倍，在內房大升浪下，係咪抵博先。
Fifi
http://www.facebook.com/lovefrystock
本欄逢周二、四刊出