獅子山掛上「我要真普選」條幅，掀起黃符遍地嘅熱潮，唔少港人睇到好窩心，覺得展現到真正香港人精神，但西環同建制派卻睇到眼擎擎，不滿獅子山都被「佔領」，結果西環副主任林武都要親自領軍，包括九龍社團聯會等多個建制派團體噚日發起大規模「反佔領」，舉行名為「獅子山下一家人」嘅登山活動，堅稱獅子山精神係「自強不息」，河蟹地呼籲大家要同舟共濟，化解矛盾喎。
喺辦內專責搞反佔中項目嘅林武現身當然唔出奇，但噚日亮點反而係玩具大王蔡志明嘅孻子蔡加讚。不但周日都肯撲出嚟支持，仲有份喺台上發言。姑勿論係咪靠父幹而火速上位，肯定嘅係佢年輕又肯苦幹，已令西環刮目相看，林武噚日全程贒實呢位富二代表現，荷蘭水蓋或全國政協，指日可待。