地產L最近去咗日本旅行，地方去得唔多，只在大阪地區行來行去，以大阪希爾頓為落腳點，對面就係大阪站，在此乘火車到神戶、京都、奈良作一日遊，都十分方便。但佢唔係從香港去大阪噃，而係趁公幹之後，喺上海直飛大阪，只需兩小時，喺大阪嘆到假期完結，先至返港。
地產L話：「在大阪地區，到處都碰到強國人，大百貨公司全部聽到講中國普通話，識中文嘅職員招呼強國人遊客，我好醒目呀，一路與日本人用普通話交談，冒充上海仔，周圍有好招呼！」日本人對遊客素來好招呼嘅箒，但適值日本GDP連跌兩季，進入技術性衰退（recession）期，日本人因消費稅高，㩒住荷包唔使錢，啲店鋪百貨公司唯有望住強國人打躬作揖啦。
地產L玩得高興之餘，又為佢公司嘅香港租務擔心，佢話：「死喇，日本Yen大跌、人民幣升值，內地遊客由上海飛大阪非常便利，日本貨依家突然便宜晒，啲上海北京遊客恐怕再冇興趣到香港噃，我地公司在油尖旺中環都有地鋪商場出租，未來咪有減租壓力？點樣維持業績？」呢樣就你諗你咯，租金無理由只識升，唔識跌嘅啫。以事論事，內地人到日本購物有着數：（一）人民幣兌日圓升值更快（日圓兌美元大貶值，人民幣兌美元升值）；（二）遊客免消費稅；（三）日本零售店對銀聯咭持有人提供額外5%折扣（記者小G聞到風聲，前星期去日本掃貨，全部用中銀銀聯咭攞折扣，笑到四萬咁口）、（四）日本售貨員招呼嘅禮貌素來譽滿全球，遠勝香港。
中日外交關係唔好，會唔會影響內地客捨日本取香港呀？未必噃，中國政府成日鬧美國干預，中國有錢人最鍾意送子女到美國接受腐化教育，中國鬧日本內閣大臣參拜靖國神社，大把中國遊客去明治神宮，只要一日中日還未真係開戰，強國人仍然樂意自上海坐飛機過大海（東海、日本海），只望唔好有太多人去踐踏金閣寺啫。
呢個星期有旅行社搞上市，就係「東瀛遊」，呢間旅行社兩位創辦人早年到東京讀日文，兼職做旅行團嘅日本導遊，讀完書諗諗吓返港一齊搞旅行社，專門做日本線，想不到今年可以成為上市公司，可見香港人到日本旅行之熱潮，三四十年不減。小YY兩歲時初到日本，一位名叫「五郎」嘅導遊在日光抱過小YY掟雪球，想不到多年後，五郎就係東瀛遊老闆之一，小YY話要買番一手股票作紀念喎。