阿爺好唔容易減息，有人話，年底前可能會再來幾次。不過，有透過滬股通搵食的戰友就要留意，如果人行喺聖誕香港紅日宣佈再減息，第二日想喺A股獲利離場就冇得諗喇！事關滬港通規定，只有喺兩邊都有市嘅情況下，才可交易。
咁嘅奇遇，竟然喺歷史上真係發生過。2010年12月26日，人行宣佈加息，結果第二日A股大跌，但港股就因聖誕假休市。如果當時有滬股通買咗A股，就只能眼白白睇住自家蒸發，冇都做唔到。
滬股通目前主要是基金北上，可能冇所謂，但對以短炒散戶為主嘅港股通來講，呢種交易時段的缺陷，就真係好大劑。
有內地散戶問過，「如果再有雷曼事件點算？」2008年，雷曼事件最高潮時，內地因十一黃金周而休市，當時恒指係內地四日休市時間內，大瀉過千點。
如果當時已經有港股通，內地散戶揸住港股幾日都冇得放，就真係一殼眼淚。
內地長假期多過香港，五一、十一、春節，閒閒地休市超過一個禮拜，外圍有甚麼冬瓜豆腐都只能捱打，風險遠遠大過抬錢過來香港自己開戶炒，難怪冇人吼港股通喇。
李可強