【中環置地廣場】聽日係賭王何鴻燊93歲生日，每年賭王都要頻頻撲撲去齊四房幫佢搞嘅壽宴，相信今年都唔例外，而三房陳婉珍嘅兩個囡囡何超雲、何超蓮前日約埋喺中環行街，兩姊妹喺Hermès左揀右揀，最後買咗一件黑色男裝褸，相信就係兩姊妹買嚟送畀爸爸嘅生日禮物喇！
任務完成各自走
前日大約下晝兩點，超蓮先同一位女友人出現喺中環置地廣場，然後就急急腳入咗Joyce，店員見到超蓮就九秒九咁攞咗大堆飾品出嚟，超蓮就望住手提電話畫面左對右對，相信係核對緊啲訂咗嘅貨品啱唔啱。然後就同友人轉去英國品牌Harvey Nichols睇衫，但行咗一陣電話就響，佢就即刻離開間舖去Hermès，原來超蓮係約咗家姊超雲。減肥成功、而且越來越瘦嘅超雲同助手一齊到，佢哋入到舖就即刻去男裝部睇衫，冷衫同外套都係佢選擇嘅範圍，顏色就以黑色為主，最後超雲就扑槌買咗件黑色褸，完成任務兩姊妹亦各自散，超蓮同朋友坐七人車離開，超雲同助手就坐賓士走。
另外，四房梁安琪兒子何猷君噚日喺微博上載咗一張葡撻相，然後留言話：「回香港第一件事：吃個澳門茶餐廳的葡塔！回來一周陪爸爸過生日。」之後猷君又貼咗妹妹超欣玩手機嘅相片，又話：「欣欣也回來咯！還以為誰這麼大膽一大早跳上我床逼我起來。」
採訪、攝影：吳耀輝、李志明
