呢日戲肉係三場香港國際賽事前哨戰，當中第七場1200米國際二級馬會短途錦標，由韋達策騎東廐「幸福指數」落飛爆7.5倍半冷勝出，呢匹三歲精英跨季近八戰五W三P，表現光芒四射，第二、三名分別係落飛馬「醒目波幅」及冷門「旗幟鮮明」，19倍啡燈Q又畀落飛黨扑中。「幸福指數」2011年4月8日出生，是今場最後生，亦是唯一一匹三歲馬，但跑落卻最犀利，14檔馬全程冇遮擋蝕位，仍輕鬆擒下「醒目波幅」，才三歲連同外國已累積8捷，大有準短途馬王風範。至於盃王大摩呢場卻表現失威，呢場出五駒僅得「旗幟鮮明」上名。
今場一眾高分馬全部死火，其中「天久」及「友瑩格」走內欄畀人阻到飛起，等於冇跑過咁滯，後駒更加收慢包尾過終點，至於星洲代表「巴拉多」亦雷聲大雨點小，初跑右轉場地有前冇後，尾二衝線。
韋達上季憑「一寶」勇奪馬會短途錦標，今季以「幸福指數」成功衛冕，個人累積連續四屆同一賽事非冠即亞全入Q，表現傲視同儕，13屆冠軍騎師，果然有番咁上下。