八方有時都好佩服反佔領嘅人士,事關佢哋中氣十足兼且特別勇武。好似噚日咁吖,白鴿黨都配合佔領運動,喺各區擺街站宣傳,點知喺何俊仁有份坐鎮嘅炮台山街站,卻有一位黃衫間條男不斷滋擾。有白鴿黨中人報料,呢位黃衫男試過搶咗義工嘅咪,搶咗啲宣傳單張後又即刻撕爛,更一度自稱收咗$500嚟反佔中,反問在場義工有冇收錢。其實包括鐵頭仁在內嘅義工都冇佢咁好氣,完全唔理佢,點知佢卻堅持挑機,就連現場嘅警員亦盡力勸阻。最終佢仲隊咗支夏枯草,唔知係補身定補番啲口水咯。