上周本欄以「抵首目標抓緊高潮」作為標題，部署借滬港通之勢沽貨減磅，講明越開得高，反高潮嘅機會越高，估唔到期指只輕微升破目標24300點後，隨即連跌幾日，幅度逾千點，而我亦跟隨上周部署，喺24300點先平一半低位揸落嘅期指好倉，至於AH股概念股亦鳴金收兵，轉戰細價股及其他國策概念股。
從「質量勢型」看大戶動態
中港兩地金融界，包括監管機構及交易所，均預料南北向每日限度會很快用盡，可是除滬股通曾於上周一用盡外，全周反應冷淡。上周提到若市場反應如此，港交所（388）短線回調機會很大，市場立即以「四連陰」表現出來，周五則以陽燭收市，回一回氣。由於外圍破頂，港股唔容易大跌，加上臨近年尾，我在電台節目中就估阿爺12月會放水，點知估錯，上周五已經按捺不住，收市後，人行宣佈調低一年期貸款基準利率0.4厘，至5.6厘，另外一年期存款基準利率下調0.25厘，至2.75厘，為2012年7月來首次。這消息令市場亢奮，上周五晚夜期升488點，收報23902點，差唔多收復全周跌幅。然而細心解讀消息，人行另指，為配合推進利率市場化改革，將金融機構存款利率浮動區間的上限，由存款基準利率的1.1倍，調整為1.2倍，內銀同業競爭勢必增加，對內銀股似乎不是利好消息，而四間內銀佔恒指比重逾15%，或會拖住升市嘅後腳，令市況不會升得「太癲」，港股繼續大型上落市格局，投資者宜炒股不炒市。
投資者現時最重要係了解內地人嘅炒股口味，就似當年自由行開通，都諗唔到內地同胞啲購買力有咁強，率先受惠嘅係化妝品同奢侈品零售商，但之後效用慢慢擴散，從日常用品、理財保險等金融服務，以至半山豪宅，皆有內地人手影；現在炒股也一樣，未來北面資金會流到邊個板塊及先後次序，都必須一邊觀察，一邊思考，盡快適應新環境，因為股市從不等人，因循守舊，隨時會被淘汰。
可以肯定嘅係，內地人最愛炒概念足市值細嘅股仔，資金快來快去，不用坐住等。這個主題查實係滬港通前已炒得熱烈，因為港股早已A股化，只是現時內地多了宣傳港股，未來細價股進入白熱化階段。恒大（3333）入股新傳媒（708），股價幾日升了十倍，大家可想而知，港股玩法已經唔同晒，事件驅動抬頭，要發掘這些神仙股，再唔可以拘泥於基本因素，因為市場資金集中玩賣殼及轉型，極其重口味，炒上之時就天馬行空，幾日就升多於十年升幅，當散戶如癡如醉追高再搶高之時，卻突然回歸現實，盈利欠奉甚至發盈警，幾日間就可以由天堂撻回地獄，如果炒這些股仲係睇年報造公司專訪就一定後知後覺，暗自慶幸自己近年研究的四變系統生得其時，察覺（質變）先識於微時，（量變）緊跟大戶上車，（勢變）敢於緊扣安全帶享受飆升，（型變）止賺訊號一出就要棄如敝屣，有備而來，「質量勢型」全部量化，大戶活動無所遁形。
張士佳