放開有條路！繼瑞典和日本後，阿爺上周五亦要劈息救市，變相承認經濟唔多好嘅現實，加上歐洲央行行長德拉吉好肉緊咁話救市唔可以再拖，好友入市當然亦delay no more，歐美股市應聲勁彈，美金再創逾四年新高。
事實上，計埋半年前率先出手嘅歐洲央行，全球經濟四大三引擎，歐洲和日本頻臨熄火，中國過度控調形同「揮劍自宮」，經濟增長潛力正在陰乾，製造業強國地位難再振雄風，加上樓市搖搖欲墜，就算醫得返都難復舊觀。
美滙指數上周五曾升到88.38，十六隻主要貨幣中，日圓表現排榜尾，跌幅達1.3%，日本經濟出乎意料陷入衰退，安倍晉三禮拜二宣佈押後到2017年4月先至再加消費稅，加上市場預期年尾大選當中，安倍領導嘅執政黨可勝出，獲得民意支持繼續推動安倍經濟學，日圓上周四曾跌到118.98兌1美元，續創七年新低。不過，日本政府官員上周開始對日圓弱勢有微言，觸發日圓借勢反彈，美元上周以117.78日圓告終。
綜觀各弱幣形勢，係delay no more魔咒下，歐元短期形勢恐怕唔會好過日本仔幾多，短期隨時下試1.2美元。英鎊會好少少，但撈底時機未至。
金價上周曾重上每盎斯1,200美元關口，但瑞士最新民調顯示，當地人反對央行將黃金儲備佔比提高到20%，令金價借勢回順，短期料繼續係1,150至1,200美元上落。至於呢個禮拜焦點應該係油價，油價見底未，關鍵在於油價禮拜四減唔減產。
奇兵