學《選戰》嘅女特首「葉晴」（李心潔飾演）話齋：「做一個政客慘過做妓女，從政第一日就要光脫脫喺人面前」；但現實生活中有意選特首嘅葉劉淑儀，對此金句似乎唔多like，事關佢周末同囡囡行街食飯撞正八方同事，不斷以私人時間唔想被滋擾為由拒受訪，其後仲爆seed鬧記者同訓示商場保安，霸氣到不得之了。
囡囡勸阻被喝「行開」
話說上周六約5時半，《蘋果》記者喺中環ifc商場撞到葉劉同囡囡喺一間日本餐廳撐枱腳，守候舉機等影相都好正常，點知葉劉埋單後見到記者即面露不悅。當記者上前禮貌向葉劉問及佔中清場同衝擊立法會睇法時，佢先反問記者係邊間報館，知道係《蘋果》後好似「食咗火藥」發惡話：「你唔好騷擾我，你知唔知咁做好冇禮貌，未得人同意咁樣影人。」在旁嘅囡囡為咗息事寧人，隨即話當時係佢哋嘅私人時間，唔接受任何訪問。
唔答嘢，都可以影吓母女溫馨行街街啩，點知葉劉即時撻着，唔單止打電話向人投訴，仲逼阿女用手機反影記者，一度勸說嘅阿囡仲被葉劉黑面「發老脾」喝道：「你行開啦！」索性攞埋囡囡部手機自己影。臨上車前葉劉不忘向商場保安人員投訴，仲當街訓示保安近一分鐘。佢當晚已經喺fb撰文，話咗唔想受訪卻俾記者苦纏，強調作為公眾人物，習慣咗面對傳媒，「但女兒不是公眾人物 ，毋須要連她的生活也要暴露在傳媒的鏡頭下」。
護女心切嘅葉劉噚日被八方問到事件時，餘怒未消，話當時真係兩母女私人時間，對於被滋擾「我真係好嬲」。查實現場所見，阿囡應對記者都幾有禮貌，當日EQ似乎高過媽媽好多喎。
李八方
mailto:[email protected]