中國人鍾意食，平日大家都會講「柴米油鹽醬醋茶」開門七件事，撞到朋友又會問問：「幾時食飯先？」貝爾斯登同Interbrand研究報告提出，中國識食嘅程度僅次於意大利。煎、炒、燜、燉、炸，中國菜式多樣化，廚藝博大精深，可惜暫時仲未有一間餐廳品牌好似章子怡咁做到「國際章」。
不過未做到，唔代表冇市場。報告就話內地有三間餐廳做到持續生產模式，就係真功夫、大娘水餃同吉祥雲吞。其中，大娘水餃以特許經營模式，成功突圍。
中式快餐又點止食水餃，一人一鍋打邊爐多人幫襯，兼可以做到上市。Frost&Sullivan嘅資料顯示，打邊爐生意銷售額由2008至2013年期間，勁增超過兩成，達302億港元，且佔整體快餐市場0.7%，發展潛力大。
搞火鍋店嘅優勢就係唔使請廚師，可慳回薪金成本；其次裝修設計成本亦比傳統餐廳低。如果火鍋店翻枱率理想，平均14個月可以收回現金投資。強國火鍋部隊「呷哺呷哺」（發音近似火鍋嘅日文發音Shabu Shabu），將嚟香港展開上市前推介，計劃集資約2億美金，折合15.6億港元。
呷哺呷哺嘅創辦人係台灣人賀光啟。16年前賀光啟由珠寶業轉戰飲食界，由台灣走到北京搞火鍋，將吧台式火鍋帶畀同胞，現時全國分店有408間，遍佈20幾個城市。
C+B
本欄逢周一刊出