燦神廖偉雄同燦嫂楊慧玲結婚幾十年嚟依然好恩愛，前日佢哋仲喺廣州搞咗個33周年結婚派對，以「制服誘惑」為主題，燦神今次唔扮乜太扮油王，而燦嫂就一身武則天造型出現。嚟自加拿大、馬來西亞、北京同香港等地方嘅朋友包括陳玉蓮等過百人一齊同燦神燦嫂慶祝，有人扮蝙蝠俠、有人扮學生同飛機師。由於燦神出年一月會喺香港舉行三場「燦神回歸演笑會七太救地球」，前晚佢喺party上都貼晒海報順便向親朋戚友宣傳一下㖭。
陳玉蓮扮自己
馮仁昭噚日打比燦神，佢話：「呢個party都搞咗7、8年。最主要同朋友gathering開心吓，我希望每一年同啲朋友可以見見面。」佢又話做人最緊要開心，佢話：「噚晚我哋玩制服誘惑，食完飯有個party跳舞唱歌同去扮嘢。因為就咁食飯太普通，咪搵啲嘢搞吓。」講到當年藝員訓練班同學陳玉蓮都專登到賀，燦神就話：「蓮妹我哋成日都有食飯見面，不過佢噚晚冇扮嘢，扮番陳玉蓮。」
撰文：馮仁昭