一位自言係中學畢業，原本係技工，後來轉業為的士司機嘅長期讀者L先生來函問及一啲保險產品之事，概要如下：
「年青時，也曾為了保障家庭和孩子，在保險公司，投保了人壽保險、意外、意外醫療保險、家居保險等。29-10-14（星期三）和某保險從業員會面，他推介了二至三種保險最新投保方法，其中最吸引是（可以在指定年期供完的人壽保險），投保方案如下：
每年供款28,410元（即每月供款2千多元），保額五十萬元，合共供十年便完成，以後不需要再供款項。由第十一年開始，每年可以提取1萬9千元，保單仍然生效，保額仍然滾存增長，約30年後，如果取消保單或身故，除了每年提取的萬九元外，仍可以有約五十萬元的保額，發還給投保者。」
讀者L問左丁山呢種保險似乎幾好，但是否真的安全可靠有保證？剛好有一個保險經紀找上門（十一月十七日），左丁山同佢稍為傾一傾，佢話不敢置評，因為一定要睇過全份保險建議書（proposal）知道內裏賠償條件及有無特殊條款，先至敢評估。照讀者L咁寫，十年供款284,100元，之後每年可取回19,000元，假設你十年後係60歲，香港男人平均壽命係81歲，仲有21年攞錢，共可取回399,000元，加81歲過身時保險賠償額500,000，總共取回899,000元，比供款多3.16倍，用一個利率折讓番現價（即net present value），等於幾多？左丁山一時之間唔得閒去計，但理論上係有可能嘅，讀者L可以請你嘅經紀計清楚俾你睇，同埋詳細解釋內裏條款。至於保險公司利用你嘅保費如何投資，係佢地自己嘅問題，投保人不須理會。
又有一位讀者馬迷M來電郵，對每逢有海外賽事直播，彌敦道太子投注站係唔肯開放二樓大堂，讓眾多馬迷站在一樓400平方呎大堂人逼人，不時釀成馬迷碰撞、扒竊等事情，甚為不滿，而且同區已長期關閉亞皆老街與彌敦中心兩個投注站，對普羅馬迷極為不便，馬迷M要求馬會負責人正視之，不要只顧住在沙田及跑馬地不時裝修嚟方便入場馬迷，但對不能入場、擠擁在投注站嘅馬迷就全不理會，成世唔裝修陳舊擠逼嘅街坊投注站！