今季NBA邊隊波最易食？76人認第1，湖人都唔肯屈居第2。呢兩支東、西岸魚腩，上周五分別俾太陽同小馬大炒96:122同106:140，真係難分高下。
湖人上周五挾住今季首次兩連勝嘅氣勢作客小馬，點知拜恩今場起手22次炒咗16球，包括剩6秒進攻時間就射球34呎air波，結果得17分。而今場起手次數比拜恩少一半、但入多1分嘅控衞林書豪就話：「隊波今場打得唔夠硬淨，大家完全冇交流。」湖人今場失咗今季聯盟紀錄最多嘅140分，13場波平均失112.5分，仲衰過未贏過波嘅76人。
76人同日主場就以26分輸咗畀太陽，輕鬆造出開季12連敗。賽前曾經寸76人廢到連自己母校肯塔基大學校隊都唔會贏到嘅太陽控衞比歷素，開波唔夠1分鐘就俾主隊嘅同門師弟路維硬block一吓，兩個仲差啲開拖㖭。另外，總冠軍熱門騎士一樣衰，作客巫師輸78:91，錄得3連敗，勝率又跌至唔夠一半。
識睇，一定係睇足英台【英波Live】：
http://soccer.appledaily.com
http://bit.ly/engballlive