由女星升呢嫁入豪門，晉身馬主太太行列，最經典莫過於李嘉欣，家陣佢每次入馬場都成為焦點，比出賽嘅名駒更矚目。最新一位晉身馬主太太嘅藝人，就係Icy黃婉曼，今個月初嫁畀有家底嘅會計師馮柏基，30歲嘅Icy幾年間跳出天氣女郎身份，攞正牌做馬主太太，好似發咗場夢咁。呢輪Icy忙啲乜？佢話明不設防，想同老公盡快「搞」個人出嚟，希望做媽媽。
另一樣佢哋想搞嘅，當然係要響馬場，搞場頭馬出嚟，事關基基隻愛駒「薑餅人」今季仲未贏馬，今期「薑餅人」角逐攞過2冠2季嘅田草1200米，如果贏到，不失為練馬師方嘉柏對基基夫婦嘅一份最佳結婚賀禮。睇番隻馬上仗季內初出，表現一啲都唔差，跑谷草排檔欠佳，全程冇遮擋形勢惡劣，都捱到個第四，今次排二檔，可以慳位慳力，雖然遇上公認質高嘅「追風駿足」，但「薑餅人」受讓14磅，Icy可能就係憑呢一點，取得佢成為馬主太太後首場頭馬囉！