紅鑽封王hold住！上周六日聯上演「天王山之戰」，榜首嘅浦和紅鑽主場對次席嘅大阪飛腳，紅鑽贏波就可以提早兩周封王，點知竟然尾段連失兩球以0:2輸波，榜首優勢更被拉近至兩分，唔通又好似07年咁臨尾香？
曾領先10分下跌盃
紅鑽喺主場出擊，連AKB48女神小嶋陽菜都着晒波衫入場撐場，不過就變咗「黑腳」。柏木陽介等攻門，都逃唔過飛腳門將東口順昭，紅鑽下半場最大機會入波就係中場宇賀神友彌，82分鐘佢左路窄位近射，又被東口撲出。原本和波收場，紅鑽都好大機會奪標，不過不幸事件喺88分鐘發生，飛腳後備前鋒佐藤晃大禁區頂勁射，收死紅鑽門將西川周作，紅鑽餘下時間空群出擊，結果反而俾飛腳有突擊機會，倉田秋幫飛腳埋齋，以2:0勝出，贈紅鑽今季第2場主場敗仗。
其實紅鑽都試過臨尾香，07年最後5周聯賽仲領先次席嘅鹿角10分，不過最後5場聯賽只得3和2負，相反鹿角連贏5場，以兩分反壓紅鑽封王。上季紅鑽喺最後3輪聯賽全輸，不單失去爭標機會，最後跌至第6，連亞冠盃資格都冇埋。形勢上，紅鑽都叫做有主動權，仲領先飛腳兩分（見附表），餘下兩周全勝就唔使理飛腳戰果，順利封王，不過下輪就要作客鳥棲砂岩，砂岩上周六1:0險勝德島漩渦，仲有爭標希望，有份「見證」紅鑽07年失盃嘅日聯專家青蛙仔都話，紅鑽拎冠軍機會都好大，不過下場對砂岩就係關鍵。
櫻花再和等降班
飛腳有機會以升班馬姿態奪標，球隊已贏日聯盃，天皇盃亦打入準決賽，有望成為3冠王，老將遠藤保仁就好謙虛咁講：「對手仍然喺榜首，領先我哋兩分，優勢仲係佢哋身上。」飛腳好風光，但同市嘅櫻花上周六作客3:3逼和仙台維加泰，距離成功護級線仲有4分，留級機會真係好渺茫。
識睇，一定係睇足英台【英波Live】：
http://soccer.appledaily.com
http://bit.ly/engballlive