年尾，公司又要你清假，撞正日圓狂跌，你開FB同IG都已經見到東京大阪不停洗板，已經知咩事。身邊女人要去掃平價冬裝，你又要跟埋去嘅話，其實幾悶嘅。因為佢哋啟動戰鬥模式之後，你已經唔再存在，直至你幫佢拎嘢為止。
身邊麻甩朋友不乏體育迷，近日都要去佔日，順手過去搵波鞋，遇着Outlet減價Yen又跌（而Outlet款亦不乏同年出品，上網查啦），隨時入番十對八對，自用送禮轉售均可。自用者，平價買罕品籃球鞋，返港落場打波自然威威。送禮者，日本有唔少跑鞋，輕身款靚怪色，仲要香港冇，跑友必中意。如果你有心搵靚嘢，拎返香港再炒都仲得，隨時幫補番唔少水腳。大前提係，一，你要同女人分開行，佢買衫你買鞋，二，帶最大個篋去，連鞋盒運返嚟。
未完，我有朋友去埋大阪睇日聯（圖），氣氛極佳，又唱歌（有歌詞單張派發）又旗海，入場前有大量飲食檔，仲有好多唔知買嚟做乜嘅紀念品（但靚囉），最重要係女球迷幾靚，咁又當然，女朋友已經去咗血拼，你可以專心睇波。至於買飛，場外一般都有即場票，多數山頂位。如果要訂指定席，上官網有晒，價錢亦唔貴。球賽連車程幾個鐘，你嘅消失對於女人嚟講絕對冇問題，佢仲會叫你唔使急㖭儍豬豬。
2020東京奧運，日本呢5年體育發展方面一定會加碼，探定路係時候。
梁栢堅
填詞人+彩池人