荷李活電影果然係夢工場，一套《星際啟示錄》提醒大家地球好危險，舉家搬去殖民星住原來不是夢；而香港嘅電視台更堅，話你知你想要乜，都要開聲爭取。咁香港電視排除萬難出到世，下一步就梗係想茁壯成長啦，咁係時候提供啲屎橋畀各位高人嘞，喂香港電視，不如播波啦！
原因一，上網求link搵波睇原本就係波友嘅專長同秘密嗜好，家陣香港電視開台網絡大塞車，你話唔合法，大家都係會自發無link搵link，香港電視能夠吸引到呢班球迷的話，正義嘅網絡波友就更樂意幫你搭建網上補給站，令更多人睇。
原因二，播波平過拍劇。喂，冇人叫你播英超德甲，一來冇版權二來你買唔起，但你可以播二線甚至三線嘅波㗎嘛。屎波無人睇？錯晒！《警界線》同《選戰》多人睇，唔係因為卡士，係因為故事！故事先係selling point，而故事有香港特色就更佳！乜波有香港特色？香港波囉！但唔到你播，不如諗吓阿根廷甲組聯賽吖，入面有小保加對河床呢個窮人鬥有錢佬嘅對決，又有幫年青人發聲嘅學生隊，仲有態度鮮明嘅獨立隊，直播時不知幾好借題發揮呀！
原因三，帶動正氣波潮流，乜係正氣？咪就係嗰堆核心價值囉，運動競技同大世界一樣，追求公平公開公正，平時講耶穌就嫌你老土啫，連住場波講就易入腦好多！太太們亦可當劇咁追嚟睇，場波係正義必勝定小人當道？睇直播先知，冇得事先劇透，分分鐘好睇過戲。
原因四係做生意，查實香港電視係做網購生意。波衫價錢跟住直播賽果可升可跌，撞啱嚟近聖誕快車，男士一路睇一路買玩具，爽；女友買禮物，快！咩話，英超英冠名花有主無得播？冇所謂啦，播住英國學界試水溫先囉！大學仲好，隨時有牛津聯，分分鐘又見肥彭！
KEYMAN
節目主持