13屆冠軍騎師韋達自從同蔡約翰「分手」之後，要再贏冠軍已經好難，不過韋達跑慣江湖，當然識走位，贏唔到冠軍，咪轉型贏多啲大賽囉！好似上季咁，佢分別贏過香港一哩錦標、香港盃、女皇銀禧盃等大賽。而近三季國際賽預賽(馬會短途錦標、馬會一哩錦標及馬會盃)韋達八匹座騎，更豪奪兩冠四亞一季一第五不失獎金，戰績傲視同儕。
今屆韋達策高廐一哥「大運財」問鼎第八場馬會一哩錦標，可期為馬房、馬主及馬匹本身完成衛冕任務。「大運財」季內兩戰非冠即亞，忠心勇銳如昔，累積八次由韋達策騎，創出五冠一亞一殿一第五不失獎金佳績，當中包括三項分級賽勝利，人馬合作威力可見一斑。
第七場1200米馬會短途錦標，韋達接手東廐新勝馬「幸福指數」，此駒來港九戰4W4P，前仗初跑分級賽即於國慶盃入Q，計卡士未必輸蝕。
第九場2000米馬會盃，韋達座騎東廐「威利加數」乃前季皇太后盃及遮打盃雙料亞軍，灰馬今季顯著復蘇，上仗G3婦女銀袋賽火併新星「包裝鬥士」雖影相飲恨，但卻跑贏應屆廣東讓賽盃盟主「貳寶」得亞軍，絕對係高水準之作。