【又一城】曾任仁濟主席嘅劉坤銘同羅霖前年離婚，結束16年婚姻，有傳劉坤銘經濟出現問題，去年反向羅霖攞贍養費，羅霖又爆曾遭家暴，一家人是非多多。但呢啲都係大人嘅事，呢對離婚夫婦依然好錫小朋友，多番爭拗後終決定共同撫養3個仔。
傾湊仔經
羅霖曾被影過帶8歲嘅細仔Jonathan陪睇化妝品，上周五（14日）晚就輪到劉坤銘做廿四孝老竇。夜晚7點幾，劉坤銘帶Jonathan同囝囝兩位朋友去又一城戲院睇戲，3位小朋友一人一句揀睇邊套戲，劉坤銘完全順從小朋友意見，最後買咗《星際啟示錄》戲飛。散場後，其中一位小朋友由屋企人接走咗，跟住劉坤銘就同另一位小朋友嘅爸爸，帶埋囝囝去商場入面嘅玩具反斗城睇玩具。Jonathan同朋友仔見到咁多玩具，即時好似甩繩馬騮咁滿場飛，而兩位爹哋就傾湊仔經，講吓應該送個仔去邊度讀書好。
玩咗大約10分鐘，Jonathan嘅朋友同佢爹哋先行離開，而Jonathan就留喺舖內睇多陣玩具，但最終都係乜都冇買。可能玩得太攰，Jonathan突然施嗲功，成身放軟從後攬實爹哋。雖然囝囝今年已經8歲，但劉坤銘依然好受落，唔怕囝囝重，即時孭住佢，仲不時擰轉頭傾偈，足見兩父子感情不錯。
採訪、攝影：潘冠恩
