天文台2015年月曆下周三起發售，每本44蚊。呢本月曆勢必係話題作，因為封面相係獅子山！莫非天文台暗撐真普選？
該幅名為「獅子山下雲光夜影」作品，係一位專影天氣嘅攝影愛好者作品。台長岑智明噚日叫大家唔好聯想同喺獅子山掛「我要真普選」巨型條幅有關，「一早揀咗，無關係！」不過佢承認「保證暢銷」，今年加印咗一倍，但總數仍少於1,000份。
新月曆共有13張氣象相片，高級科學主任宋文娟話，係從公開徵集嘅2,800張作品中揀出嚟，早喺8月8日已敲定封面用獅子山相，以配合「獅子山下人人報天氣」主題，上月23日蜘蛛仔掛真普選巨幡時，月曆已印製中。月曆可於政府刊物銷售處或天文台買到。
另外，甘願傾盡家財買同天氣有關舊相嘅岑台長，近日又用幾千蚊「友情價」，買咗本百年古書，係一本由日本攝影師拍攝1906年9月18日颱風襲港後情況相集，當年死咗逾1萬人，嗰本相集係賣嚟籌款賑災。呢個無名風導致嚴重傷亡，事關當年一艘泊係香港嘅法國魚雷艇被吹沉，數名水手死亡。岑台長話，當時法國駐港總領事向港督投訴天文台預測唔準累死人，令首任台長William Doberck被提早退休。