網媒「本土新聞」總編輯梁錦祥被指涉嫌策劃衝擊立法會，前日俾人拉咗，獲准保釋，但呢單嘢已經觸發熱血友同被指篤「台長」出嚟嘅網台「花生台」全面開火，仲燒到「花生台」嘅陶君行身上。有社運界中人指今次拉「台長」，除坊間所傳與「花生台」所登嘅相有關之外，其實亦關黃洋達日前同傳媒講會掛記者證留守清場有關。
話說黃洋達早前同《明報》講，話如果旺角清場，佢一定唔會坐喺度等拉，到時會戴住記者證，觀摩執達主任點執行程序，仲話自己係《熱血時報》記者。該社運界中人同八方講，其實差人一直針對網媒記者，成日當正佢哋係扮記者嘅示威者，只係一直冇位入佢哋，𠵱家黃洋達既然係熱血公民阿頭，以往又帶頭衝過差人，𠵱家又公開講話會戴住記者證「觀摩」清場，正好畀藉口差佬將網媒等同示威者，大條道理日後針對網媒拉人！
至於「台長」被拉關唔關黃洋達呢番言論事，就好難講，但佢噚日再同《明報》講，有關言論只係講笑，話唔係用記者證做護身符怕被拉，仲話真係咁就叫《熱血時報》即刻印一萬張記者證啦！皇上咁講明顯知自己講大咗會累街坊，否則使乜話係講笑。