西甲雙雄皇馬巴塞一齊逼爆！皇馬靚仔占士洛迪古斯（J-Rod）賣相咁標青，自然多人搵佢拍廣告，由佢做代言人嘅底褲廣告最近發佈，大晒靚肌肉之餘仲相當激凸！嗰邊廂巴塞就唔係由球員做代表，尼馬新歡蘇拉查（Soraja Vucelic）大騷「弗」爆身材，着住似乎細咗個碼嘅比堅尼遊走沙灘。
蘇拉查比堅尼look誘人
J-Rod今季加盟皇馬，初頭表現麻麻，但最近已經逐漸融入球隊。占士仔喺場上同隊友C朗默契越嚟越好，場外都學埋後者，推出自己品牌嘅底褲。C朗有自家「CR7」內衣褲系列，J-Rod最近亦親自為「J10」內衣褲系列做宣傳，大晒胸肌、腹肌同人魚線之餘，仲靠新產品充份顯示出「激凸」線條，粉絲們真係大飽眼福囉。
至於巴塞球星尼馬最近搭上塞爾維亞模特兒蘇拉查，據講兩人打得火熱，尼馬有次仲緊張到出動私人飛機去塞爾維亞接蘇拉查嚟西班牙聚吓。蘇拉查最吸引之處係豐滿嘅雙𥧌，而佢亦唔介意分享吓，日前到喺黑山一個沙灘上嬉水兼曬太陽，着住件得好少布嘅比堅尼泳衣，美好身材一覽無遺；唔知尼馬見到之後，使唔使又要即刻出動佢架私人飛機，嗱嗱臨接佢過嚟gathering呢？
識睇，一定係睇足英台【英波Live】：
http://soccer.appledaily.com
http://bit.ly/engballlive