【記者張嘉雯報道】月初在旺角十字路口被警察扑爆頭的阿琪，頭上傷口已復原，腳部仍有瘀傷，但整體無大礙，他指當時警方誣陷他丟頭盔，正與律師商討向警方追究責任。一直被指易服的阿琪是雙性人，正排期切除陽具，最希望佔旺者不要誤會他，亦希望真普選來臨，任何性別都有平等選舉權。
阿琪表示，當晚坐在砵蘭街路障附近，被警方指丟頭盔，「扯我出嚟打，打咗五至八分鐘，個頭打咗一下，又踢咗我10幾20腳，將我成個撻落枱、拖行、成個人撞埋牆紙舖度鐵閘，然後叫我走」。翌日其父發現他後頸瘀腫，到醫院求診，現已康復。
留守只是出一分力
阿琪今年23歲，是大專生，為普選罷課兩個多月，留守旺角保護同路人。他經常以女性打扮示人，不少旺角人背後對他議論紛紛，阿琪自言是雙性人，從小家人及自己均以為他是男生。 「成日肚痛，一次就話食錯嘢，兩次又係食錯嘢，無理由第五次都係食錯嘢㗎，咪去睇醫生」。結果發現他除了陽具，尚有女性生殖器，不久更來經，之前的腹痛原來是經痛。
阿琪自言從小均自覺是女生，「小便會坐喺度，從來唔會企喺度，好討厭嗰個器官（陽具），見到好反胃，平時好少見我着男仔衫，覺得好唔舒服，係見阿婆佢唔鍾意，我先着番男仔衫」。 戀愛對象，他首選女生，「無論我係乜性別，我都係鍾意女仔多過男仔，雖然都有同過男仔拍拖，但同女仔一齊，可扮靚買衫行街，去洗手間隔住塊板仲可以傾偈」。
他拍拖次數近10次，每次向伴侶透露雙性人身份，就馬上被甩，「個個我都係真心鍾意，但冇一個係真心鍾意我，有時好後悔講出真相，但又唔想呃佢，覺得好對佢唔住」。他正排期服用抗雄激素及切除陽具手術，「盡可能快啲消失就好喇」。
阿琪自言並不勇武，留守只是出自己一分力，不會衝擊，清場也不會反抗，抗爭至今，最介懷被誤以為易服或背後被笑為「人妖」，「啲人話我不男不女，其實我只係基因出錯」。他認為普選精神，人人平等，「個個人都有權選同被選，唔會分佢係乜人，唔理佢男又好，女又好，跨性別又好，一樣有權利。」