旺角佔領區上月「光復旺角」一役中警民爆發嚴重衝突，不過一名警員執勤期間，仍肯應示威者要求，借出樽裝水分享，獲得集會人士及示威者讚賞like到爆，更被封為「警隊男神」，事後佢話「冇諗過畀啖水會有咁多人like」，又呼籲示威者唔好衝動。
自爆細佬支持佔領
旺角佔領區預計下星期清場，政府新聞網噚日播出「警隊男神」訪問片段，「男神」原來係西九衝鋒隊員任卓敏Ivan，佢話對於被市民讚感到開心，更透露自己細佬比較支持佔領示威者，兩兄弟喺屋企，都有討論佔領行動，佢會向細佬解釋警方行動原因，但始終都係冇乜共識，有意見不合情況。
訪問片段長約兩分半鐘，包括任卓敏着便服去旺角佔領區閒逛嘅片段，新聞處玩親民，幫警隊洗底陣「除」十分之強烈，對於被封為「警隊男神」，佢笑言係「吹大咗」，但指借水片段曝光後，細佬都讚佢做得好，同時facebook亦有很多人想同佢「做朋友」。他話借水飲事件其實微不足道，「好小事，相信（示威者）都係想警察維持番對市民嘅信心」。
佢又話，警察樂意協助和平示威，呼籲示威者唔好衝擊，因為會導致自己同警察受傷，亦唔同意霸佔道路，因為令交通唔能夠如常運作，總之希望香港回復以往正常秩序，互相遷就忍讓，大家可以開心行街就最好。
李八方
mailto:[email protected]