呢排網上足球世界其中一個熱話，就係有張「那些年，你一定踢過的衞生波」嘅11人圖，當中演繹咗香港人踢波時總會遇到嘅角色。Lulu身邊都有唔少朋友，爭住認自己係邊個邊個，最多人係都唔認自己係「自以為最好波」一個，更加多人唔會認自己係「最廢嗰個」，其實呢啲都係得啖笑居多。不過，Lulu覺得，應該要加番一個「成日傷」嘅角色，不過唔係畀香港用，而係畀曼聯！
過埋啱啱嘅國際賽周，曼聯終於可以排出一個完整嘅11人，不過係講緊傷兵11人，唔係正選名單。傷咗咁多人之後，我真係諗唔到雲高爾仲可以喺𠵱家嘅材料，煮到幾好嘅餸出嚟！所謂「巧婦難為無米炊」，再好嘅教練，都要有足夠人手，先可以發揮出應有功力。雖然雲高爾暫時戰績比莫耶斯帶隊嗰陣更差，但我覺得唔應該賴晒喺佢身上，起碼至少仲未聽到，有球員想反雲高爾吖！
受傷當然冇人想，對於呢個情況，除咗求神拜佛之外，都真係唔知可以有咩做。近日曼聯傳出會喺1月時搵尼曼查維迪返嚟，以佢咁熟悉曼聯嚟講，當然無咩問題啦，但希望紅魔唔會因為球隊後防缺人，而喺1月嗰陣大手買人；始終有新球員，唔代表成績一定會有改進，倒不如畀吓機會班年輕球員，話唔定會有意外收穫呢！
山齊士連續6場「士哥」
雖然我信曼聯未來可以改善成績，但未必係今個星期發生嘅事，因為阿仙奴嘅阿歷斯山齊士實在太fit，連埋國家隊比賽，已經6場賽事有入球，有個咁勁嘅球員喺度，阿仙奴入波絕對唔成問題。雖然曼聯都有朗尼大勇，不過迪馬利亞有傷在身，未知能否披甲，加上後防太多傷兵，作客應該好難去抵擋阿仙奴嘅攻力，兵工廠應該可以贏2:0！
LULU
不懂踢波愛睇波