其實好耐都冇追睇大台劇集嘅衝動，不過近期套《老表》又真係幾爆，唔理佢係真心膠定假膠，連張繼聰都夠膽講謝安琪老公係廢柴，蔣志光同韋綺姍仲爆紅番，「相逢何必曾相識」又成為呢排金句。
「同是天涯淪落人，相逢何必曾相識」，曼聯同AC米蘭出年1月就相逢，以往呢個歐聯淘汰賽戲碼，𠵱家淪為去中東掘金嘅表演賽，鬼叫兩軍都冇得踢歐洲賽咩；不過講淪落，A米肯定差過曼聯啦。以曼聯人腳，今季重返前4真係易如反掌啦（我真心㗎），而且紅魔鬼財政底子咁雄厚，就算冇得踢歐聯，今季都使到億幾鎊擴軍，邊似得今場對手阿仙奴咁，年年踢歐聯，收入照計都唔少，但領隊雲格買人係要講價講到牙血都出埋先成交。
最近有報道話，英超平均年薪冠絕世界頂級聯賽，曼聯當然貢獻唔少。喺紅魔陣中叫得做巨星嘅朗尼、尹佩斯同迪馬利亞等，拎6位數英鎊周薪當然少不免；新星贊奴沙上季踢咗幾場好波，就有得續約拎幾萬鎊周薪，今季幫曼聯堅壁清野嘅泰萊布力基同麥尼亞，睇嚟又好快續約加薪㗎啦。曼聯財來自有方，出年夏天去吓亞洲之旅又執幾千萬，連食個杯麵都見到朗尼，又點會驚財困吖。
文：牽牛