商交所爆煲超過一年，但辦公室竟然依舊佔領數碼港。華華早幾日晏晝路經數碼港，發現商交所嘅辦公室門牌、商號仍然喺度，其間仲有疑似裝修工人打開磨砂玻璃門，誤將華華認作執達吏，要監督清場，咁當然係一場誤會啦。
呢位裝修工人知道華華唔係執達吏，就好好心咁講咗句「呢到結業咗啦」，然後就再次關上磨砂玻璃門，估計佢係繼續清場卦。
查實商交所早喺舊年5月，已經放棄咗證監會批出嘅自動化交易服務（ATS）供應商資格，之後主席張震遠又捲入欠薪風波，數數手指已經踏入第16個月，但商交所嘅辦公室竟然仲未遷拆，認真奇怪。
商交所涉及嘅欠薪案就喺明年1月開審，辯方會傳召包括創辦人張震遠等五名辯方證人，而佢到時會交代商交所財務狀況嘞。