超人李嘉誠又一件「玩具」殺入香港！繼Hampton Creek嘅人造蛋黃醬喺超市有售，LED燈膽研發商Nanoleaf噚日宣佈，登陸超人旗下連鎖零售店，三款產品嘅價錢介乎268至368蚊。
Nanoleaf創辦人之一閆思成（Christian）話，家陣仲係一間細公司，未做到量產減成本，承諾將來一定會減價。
超人交畀紅顏知己周凱旋打理嘅維港投資，近年積極投資多間新科技公司，Nanoleaf係其中之一，產品放喺超人旗下零售店度賣，亦理所當然。
Christian話，暫時預備咗5,000至1萬個燈膽在港發售，另外有2萬個燈膽處於生產階段，估計明年會賣去歐洲、中東、美國等地。
Nanoleaf燈膽嘅賣點係超級慳電，比起一般燈膽嘅耗電量低88%。Christian透露，下月會有外形更似燈膽嘅新產品推出，明年計劃推出4至6款新產品，主攻食肆、酒店等商業市場。
Christian透露，𠵱家定期跟維港嘅團隊開會，至於超人與周凱旋，就較少機會見面了。