自由黨精神領袖田北俊雖然被中央炒魷冇得做政協，因此辭埋黨魁，但田少卻比之前更加「鋒芒四射」，霸氣金句停不了，完全無因為被中央搣柴，怕咗與民為敵嘅特首。
佢前日仲喺自己嘅facebook，透過引述方式，爆粗暗批狼英，獲網民擊節讚賞。事緣佢喺fb貼咗張今個星期二、佢同1963年男拔萃中學同學聚餐嘅相，仲意有所指留言話：「佢哋一邊讚我好嘢，一邊又笑我做乜仲唔退休去玩孫，叫我唔好同D人嘥X氣！哈哈哈！」平時官仔骨骨嘅田少，繼而同網民講聲唔好意思，半自嘲話拔萃仔零舍多粗口喎，但查實對住689，有邊個唔想爆粗吖。田少同八方講，男拔仔有兩大特點，除咗講粗口、仲會幫人改花名，笑稱讀書時都會爆粗㗎。