被里昂稱為「幽靈列車」嘅滬港通真係好邪！開通以來，港股如撞邪般係咁瀉唔再講，連續四日排在滬股通成交首位的股份，竟然都係有「A股魔咒」之稱的大秦鐵路！李小加口中的「1117號列車」，車上「乘客」竟然愛上了大秦鐵路，搞到有內地股民網上大嗌，「求求你，放過我們吧！」結果就係， 滬綜指跟住要由高位碌番落嚟。
大秦鐵路是全球最大的煤炭運輸鐵路，的確係好威，但其「魔咒效應」一樣咁威水。
2007年10月15日，佢股價升停板，滬綜指同日上到6124點後開始大瀉；去年2月18日，再次升停板後，滬綜指又由2445點一路下跌； 8月15日，佢又升8%，第二日內地就出現「光大烏龍指」事件震散股市；而今次，亦是由股價在周一高開6.8%後，一路係咁跌。
按股市慣例，凡係輪到公用股升時，升勢已近尾聲，開始散水。今次北上資金狂掃大秦鐵路，本來貪佢係高息率的公用基建股。
不過，滬港通之前嘅A股各個板塊都已經被炒高，輪到佢升嘅時候，好自然發揮其「藍燈籠」嘅效應，除咗令南水接火棒之外，仲再一次做咗魔咒。
李可強