城市撕裂、氣氛沉重，龍叔叔呢幾個禮拜做乜都提唔起勁，好慣性咁跳入電影世界，逃避麻醉一下。啱啱睇完齣全球口碑勁好嘅《星際啟示錄》，望住點點繁星遨遊浩瀚太空，的確有種心靈放盪嘅舒泰感。不過故事背後嘅太空理論同劇情，都唔係一時三刻可以消化到，加上父女別離嘅情節，睇完之後心情仲沉重。反而龍叔叔最感受深刻嘅，係時間唔會等人，hea吓hea吓，原來又到交稿死線。
嗱嗱臨落旺角DVD Pro挖碟，老友Andy話「老變」效應下，仲係冇乜大片敢硬碰，《銀河守護隊》要下個禮拜先到貨，暫時得隻《馴龍記2》BD叫做勁啲。吓？卡通片冇乜feel喎。好彩啱啱洲立派貨，喺紙箱拎起隻新鮮熱辣嘅《罪惡城2：蛇蠍情人》BD，龍叔叔好滿意咁畀錢走人。
等咗足足9年，堪稱黑色暴力美學經典嘅《罪惡城》，喺個個企喺道德高地嘅城市，絕對係一服毒藥，龍叔叔當年一食上癮，一直期待續集嘅來臨。第二集副題名叫得做《蛇蠍情人》，齋睇個名，已經知套戲一定肆意賣弄美色、暴力同復仇。雖然《神奇四俠》索女Jessica Alba仲喺度，但係好明顯最擔正嘅主角，其實係蛇蠍情人Eva Green。龍叔叔喺《新鐵金剛智破皇家賭場》已經好鍾意佢，今次佢仲三點畢露全裸演出，成套戲講佢點樣勾引男人上位，一班型男受佢擺佈互相廝殺，聽落好似好吸引。
電影主張嘅黑白畫面，喺紅唇同血濺上加番色彩，第一次睇的確會感受到莫名嘅震撼。只可惜Eva Green身材樣貌已經不復當年勇，一班男人仲為佢打生打死，大大減低劇情說服力，難怪齣戲叫《蛇蠍情人》唔係《蛇蠍美人》啦。更可惜嘅，係黑白畫風、拳拳到肉、血花四濺等場面，只係延續到上集嘅特色，新意完全欠奉，仲跟足之前咁個個角色不停旁述自我心態，成齣戲就係一堆獨白，負責人聲嘅中置喇叭，粒幾鐘內幾乎未停過震，其實都幾煩膠。
二百幾蚊買會郁嘅漫畫
最慘係劇情支離破碎，三條主線冇直接關聯，夾硬搵間酒吧串埋，人物塑造同暴力場面一樣血肉模糊，睇到龍叔叔有啲忟憎，莫講話同cult片之王導演昆頓塔倫天奴差天共地，就算同自己第一集比都輸足成條彌敦道。This "city" is dying，睇怕呢個《Sin City》都到此為止，都幾難有第三集喇。
至於BD表現，呢類cult片喺聲畫上都冇乜要求，高清下的確可以將黑白美學發揮得更加漓淋盡致，槍聲、拳擊都叫做表現到清脆定位同低音震撼，而且3D效果喺呢套超過一半係電腦CG嘅電影入面，理所當然咁有更好表現。一隻碟有齊2D同3D版本，唔出孖碟版屈錢，算係呢隻BD較可取一part。如果你抱住睇「會郁嘅漫畫」嘅心態，呢二百幾蚊會洗得順氣啲。
龍叔叔心情繼續低沉，畀隻黑白《Sin City》蹂躪咗粒幾鐘，索性將趕稿擺埋一邊，開番隻色彩繽紛嘅《SimCity》玩吓，平衡心情。
龍叔叔簡介
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
