股票滬港通在十一月十七日開通，港股認真唔俾面，未開市就升定二百幾點，但下午四點收市就跌咗290點，而且滬股通額度（130億元）用盡，港股通（內地人買港股）額度只用咗一成七，可見內地人對港股興趣不大，想話北水南調嚟沖喜、沖起本港股市，冇咁易，反而係南水北調，香港資金流入內地至真。當然此乃一日之現象，不可作準，假如中期（三個月內）仍然如此，則梁振英上京為港人爭取中央禮物之說，好令中央及梁振英尷尬。分析師及華爾街日報講得啱，香港再一次發揮國際金融中心作用，以滬港通幫助內地股票走向國際化、自由化呀，當然係逐步嚟啦。
滬港通開車第二及第三日，港股再跌414點，收報23377點，滬港通真係未見其利，先見其害，梁振英一派之前猛講CY為香港爭取到中央大禮應記一功，大家要記住嘞。
經常噏得出就噏嘅內地報紙《環球時報》竟然還要大言不慚咁講：「香港社會能把送上門的利益抓住多少，最終兌現多少，還不一定。中央政府並無法把送上門的飯再餵到香港嘴裏。」幾難聽噃，老實講，自由行遊客過往十年來港旅行勉強可以講得係內地人送飯到港，但在自由市場體系之下，內地人亦用飯來取回不少高質物品、高質服務，有利內地人擴闊視野，造福下一代（例如正貨中藥、正貨奶粉），香港並非吃嗟來食，十年過後，內地遊客識得去巴黎米蘭東京大阪紐約倫敦送錢俾外國人使，可以唔嚟香港，香港亦唔會呼天搶地嘅唧。但講到股票，內地人如來香港買股賺到錢，絕對係來港搵米啫噃，點會係中央送飯上門？依家情況係國際資金利用香港窗口送錢到上海股市至真，中央得益更大。過去十年，中國大戶在港買股票，持有十年嘅話，賺錢一定比在內地買A股多，環球時報社評講滬港通只識寫政治八股，唔識股市投資分析，可見內地媒體幾咁人才缺乏，又或者係同一句，有人才都冇用，在中國一言堂緊跟路綫走嘅制度下，點都難以在官方媒體訓練到一流人才，「寫字工人」就會出到一大堆。