中國金融投資（605）近一年佈定晒局，拍住猛料企業，又面向住潛力勁厚嘅中小企貸款市場，得6倍單位數嘅PE，有得諗。
中金投係北京最大嘅中小企貸款企業，單係睇本身嘅實力，剛啱喺上個星期，就多咗位機構投資者China Orient Asset Management，做中金投股東，揸咗中金投5%。
搞車貸闢新財路
又中金投除咗喺上年拍住祖國最大嘅第三方財富管理機構──諾亞，合作搞資產證券化產品之外，喺今年，又同天津銀行北京分行與慧聰網（2280）簽訂戰略合作協議，進一步擴大北京市場，再拓展網上業務。呢批合作夥伴，都係大孖沙嘅級數。
再睇市場，中金投主打北京區，中小企貸款每年需求，高達3,000億銀人仔。喺小中企銀貸始終有難度底下，單係面對北京咁龐大嘅需求，中金投已經坐定粒六。喺呢期，中金投兼踩到去上海，進一步開拓當地二手車質押貸款項目。呢一瓣業務，流動性高，兼避免好似房貸高壞賬嘅問題，開多咗條穩陣嘅財路。
中金投今年上半年，唔計非現金性開支，盈利實際係增長咗33%，到1.6億元，呢個數額，已經等於上年全年盈利近70%，靚仔到痹。隨住新發展，集團今年keep住33%盈利增長，問題唔大，又就算連埋上半年配股攤薄計，EPS去到9.2仙，增長19%，現價（0.58元）嘅預測PE，得6.4倍。
更吸引嘅係，中金投家陣PB僅得0.86倍，場內行家中國信達（1359）1.4倍PB、遠東宏信（3360）亦挨近1.4倍、中國融保（8090）6.9倍，中金投平咗一大截。買中金投，當翻半番到0.86元計數，PB先啱啱追返上呢批行家。
錢雋
細價股專家
本欄逢周二、三、五刊出