金管局總裁陳德霖畀人嘅印象，比較嚴肅，亦少談私事，噚日佢出席中大崇基學院畢業禮演講時，竟然透露兒時與年青時代一啲小挫折，又教同學們如果遇到女神，就要有所行動先至有機會，但有時「要接受有啲事唔可以一蹴即至，亦要知道有時要知所進退」，呢句說話明顯就係針對雨傘運動嘅。
寄40封求職信冇回音
陳德霖自爆，兒時嘅理想，除咗係讀書考到好成績，就係可以被抽中參加一個電台兒童節目，藉此得到一份可口可樂特別訂製嘅木搖搖，不過佢一直攞唔到呢份獎品。
升讀大學之後，佢就希望能夠考到一級榮譽，之後喺大學做兩年助教，儲兩年錢，再出國深造，攻讀碩士或者博士，可惜，最終佢考唔到一級榮譽，亦做唔成助教，只能夠積極搵工做。
咪以為佢搵工好容易，原來佢當年以漁翁撒網方式去搵工，寄出40封求職信畀香港各大公司，竟然冇回音，連一次面試嘅機會都冇，真係講都冇人信。好在佢同時申請多個政府職位，全部都話請佢。
佢最初做政務主任，之後平步青雲，1993年金管局成立時過檔，2005年離開過，2009年任金管局總裁至今。其實，佢噚日想講嘅，都係老生常談，就係要付出努力先可以達到理想。
佢以追女仔為例，如遇到女神，但一直唔行動，咁樣肯定追唔到女仔咁話。華華希望將來有機會聽埋陳總嘅愛情故事喇。
李華華
mailto:[email protected]