向來鍾情投資磚頭嘅賭王「四太」梁安琪，近年買親都係幾億以上全幢物業，而且多數都係長線持有，好少放售手上物業。但凡事總有例外，今年已經用咗接近37億元掃貨嘅四太，突然放售持有20年嘅尖沙嘴星光行頂層單位，叫價只係760萬元。
四太放售嘅單位係頂層23號室，係一個得894呎嘅的骰寫字樓單位，意向價760萬元，呎價8,500蚊，呢個單位剛新起租，月租實收2.7萬元。據放售代理中原工商舖話，四太當年以呎價2,000蚊買入呢個單位，如果成功沽出，賺3個開有多。
不過，呢個頂層單位有部份海景，因乜解究叫價比市價每呎9,000蚊便宜呢？原來星光行頂層冇電梯到，要搭去18樓再行一層樓梯至上到去㗎。
四太當年豪擲6.25億元勁掃星光行130個單位，華華估計四太都唔知道邊啲賣咗，邊啲未賣。