葉朗程將私人銀行家嘅生活寫得多姿多采，永隆私人銀行及財富管理部主管譚劍偉（Joseph）就話，個別客戶唔易應付㗎。
佢指，香港客戶比較精打細算，試過有位身家過億嘅大客，要求銀行幫佢豁免千幾蚊嘅公司查冊費，否則唔肯開戶。佢無計可施，最後要求客戶嘅太太幫口，先至做得成呢單生意。
根據金管局指引，私銀客戶嘅流動資產至少要有1球美金，永隆私銀嘅門檻高少少，要達到1,000萬港元。但唔講唔知，原來唔係有錢就做到私銀客戶，仲要過到「認識你的客戶（Know Your Customer，KYC）」呢一關。Joseph透露，試過有人搵到10個客，只得兩人開到戶口。
佢指，曾經有人聲稱係清朝皇族後裔，想開戶口，咁點樣證明呢位仁兄有錢呢？資金來源又點呢？佢話屋企有好多古董，照咁講，即係國寶喇，國寶唔賣得㗎喎，最終當然做唔到呢位仁兄嘅生意喇。