一部電影大賣，就要看天時地利人和，周顯揚執導、張晉有份參演的《黃飛鴻之英雄有夢》明顯正在行運。雨傘運動的示威者用雨傘擋胡椒噴霧，有議員指看過黃飛鴻電影便知道雨傘是「武器」；其後「暗角打鑊」事件，當公義不再存在，港人更希望有黃飛鴻儆惡懲奸，周顯揚謂：「其實人嘅心靈上永遠都需要一個有正義感嘅英雄。」
撰文：文國駿
導演周顯揚與演員張晉，日前為電影《黃飛鴻之英雄有夢》宣傳，於將軍澳接受本報專訪。近日「雨傘運動」正是社會熱話，在公在私作為深黃的一分子，自然要問一下導演對事件的看法。
周顯揚之前宣傳時曾表示，整個電影拍攝及劇本同是一個「明知不可為而為之」的故事，問他會否覺得與雨傘運動中抗爭的學生頗為相似？不知是否礙於有電影公司人員在旁，他只簡單的說：「我覺得大家都經歷過年輕階段，你嘅問題我有自己嘅歷史觀，所有問題，睇番歷史就可以知道，我成日都鼓勵年輕人，我拍戲用好多青年，我覺得年輕人要畀多啲機會佢哋落手去做，好多嘢你可能會覺得好難，但其實有決心就可以做得到。」我並非導演心入面條蟲，我當然不能肯定他所說的「年輕人要多啲機會落手去做」及「有決心就可以做得到」這些是暗撐學生的說話，還請讀者自行判斷，反正我是信了。
東方英雄黃飛鴻
黃飛鴻系列電影是港產片中的一個經典，問到周顯揚今次能夠拍攝以黃飛鴻為題材的電影對他有何意義？他表示：「我覺得黃飛鴻係一個載體，有啲似占士邦、蜘蛛俠、蝙蝠俠，佢係東方嘅一個超級英雄。以前關德興飾演嘅黃飛鴻係一個說教形象，到李連杰時成件事就更新咗，young咗好多亦都好成功。荷李活都有呢啲不斷更新嘅例子，近期好成功有占士邦，我就覺得呢個構思好好玩，我仲希望5年後香港有一個比我更後生、更有想法嘅導演可以再reboot，唔係話以前嘅經典，𠵱家就唔可以去搞呢個題材。」
周顯揚以往的電影如《殺人犯》及《大追捕》多描述陰暗面，看完會給人一個陰沉、不太舒服的感覺，他坦言今次亦是一部「暗黑版」的黃飛鴻：「其實我一直好恨拍一部黑社會電影，洪金寶坐喺度已經好似黑社會大佬啦，所以呢部係黑社會電影。而我又好鍾意歷史，尤其係鴉片戰爭到解放嗰段時間。鴉片戰爭係中國黑暗時期，嗰陣一口通商，廣州聚集好多外國人，龍蛇混雜，以前黃飛鴻打奸人堅，今次我要佢打黑社會。」
前期準備最重要
該片是周顯揚的首部民初片，他坦言自己因為覺得好玩及寓工作於娛樂，所以做資料搜集及拍攝時皆不感辛苦，他謂：「嗰陣《大追捕》之後好多人想我拍第二集，但我有難處，因為已經「榨到乾咗」，古裝片就好似一嚿新海綿「榨極都有」。拍電影對我嚟講最有樂趣係前期準備，我直接跟過李安導演做過兩年嘢，佢係世界上其中一個對電影前期準備做得最足嘅導演，呢個係肯定，我學到好多嘢。我當然無法同佢比較，但今次做咗樣幾特殊嘅嘢，我喺開機拍前半年，試拍一星期，雖然有人話七日分分鐘拍到一部戲，但我選擇試拍，因為呢件事對我好重要，不容有失，結果試拍好有用。」
延續馬三氣勢
「學好功夫等運到」是不爭的事實，對自少習武的張晉而言有另一番體會，早前憑《一代宗師》的「馬三」一角榮升金像獎最佳男配角，擺脫「蔡少芬老公」的出場敍。今次張晉在《黃飛鴻之英雄有夢》中飾演武功高強的黑幫少主與馬三類似，比較跟壓力應運而生，他說：「冇壓力，如果重複角色先會有壓力，比較一定存在，如果自己好介意，會阻我演戲發揮，新嘗試係必須嘅。其實我都想試搞笑，我冇喜劇細胞，但我試過係現場好正經，但人哋笑我。」
對於今次的黃飛鴻經典再造，張晉坦言有份參與感到榮幸：「黃飛鴻有好多個版本，隔咁多年再拍，我有份參與，感到好榮幸。我一路keep住訓練，今次戲入面耍大刀，耍起上嚟手腕好痛，休息時要針療，無論我係咪有功夫底，都會盡全力去拍。」他又大讚對手「後輩」彭于晏：「我同佢有一場重要打戲，佢好努力，佢短時間達到呢個地步好驚人。」
【三個粉絲去首爾】
追星實錄，即上韓劇讀： http://hk.apple.appledaily.com/kstar