時近年尾，又到年度風雲人物選舉嘅旺季，而美國《時代雜誌》選出嘅風雲人物，向來都備受注目，原來呢個咁有份量嘅人物，除咗由採訪部選出，全球唔同國家嘅網民亦一人有一票。而曾以標題「抗爭的臉孔」登上封面嘅學民思潮召集人黃之鋒，入選年度風雲人物嘅候選名單之中，暫時位列11，排位竟較美國總統奧巴馬及阿里巴巴集團董事局主席馬雲仲要高，認真英雄出少年。
排頭位嘅係俄羅斯總統普京，而引起全球關注、奮勇對抗伊波拉嘅醫護則位列第三；出爐諾貝爾和平獎得主馬拉拉暫排第四。有興趣投票嘅讀者可到以下網頁睇睇，投票截止日期為下月6日，網上投票結果會喺8號公佈；而由雜誌選出嘅風雲人物，就會喺10號誕生。 http://time.com/3562179/time-person-of-the-year-poll/