講到鬥傷兵多呢方面，近年都係曼聯同阿仙奴之爭。有時真係百思不得其解，都唔知呢兩隊係體能教練出問題，定係隊醫冇料到，抑或風水唔好？但有樣嘢肯定嘅係，至少幫莫耶斯平反咗一項罪名。
講曼聯先，費格遜當年傷到要搵卡域克拍費查打中堅；到莫耶斯時代，拿尼、費蘭尼同尹佩斯等傷多過踢；到𠵱家雲高爾帶咗幾個月，條防線傷晒咁滯，3個領隊都面對住同一困境。仲記得上季，唔少曼聯球迷都責難莫耶斯偏重體能操練，訓練方法又落後；但點知被視為更先進嘅雲高爾嚟到後，傷兵情況仲嚴重咗，莊尼伊雲斯、菲爾鍾斯同基斯史摩寧集體「玻璃化」，相信令唔少魔迷大跌眼鏡，心入面都對莫耶斯有啲歉疚。始終上季要佢孭起成隻黑鑊；但𠵱家開始發現，呢隻鑊唔止屬於佢一個。
曼聯單線作戰，4個中堅都唔夠用，真係始料不及；但阿仙奴踢英超又要踢歐聯都得3個中堅，就似乎係雲格太老定。佢又唔係第一年教阿仙奴，阿仙奴傷兵一大籮又唔係第一年發生，點解唔喺暑假做好準備呢？比起傷兵居高不下，雲格點解死都唔買多啲中堅，呢個謎團就更令人費解！
文：咖喱