男神黃子華講過，當大家見到自己鍾意嘅藝人，你就同佢講：「除褲啦！」似乎科特迪瓦球迷都睇過子華嘅棟篤笑，但佢哋見到自己鍾意嘅球星，直情衝埋落場除佢條褲。邊位球星咁受歡迎？咪就係髮型獨特之餘，衣着品味亦與眾不同嘅謝雲奴囉！
星期三嘅非國盃外圍賽D組，科特迪瓦最後一輪喺主場對喀麥隆，呢場亦係科軍隊長耶耶托尼第100次為國披甲，但佢完全俾隊友謝雲奴搶晒鏡！呢場兩隊踢成0:0，攜手出線出年喺赤道幾內亞舉行嘅決賽周。
見到球隊晉級，主場球迷衝晒入球場慶祝。唔少球迷鍾意玩門楣當玩單槓咁，搞到龍門架冧埋；但亦有球迷鍾意玩熊抱同埋剝人條褲。有位着住意大利波衫、個樣有3分似巴洛迪利嘅球迷，當正前鋒謝雲奴係老婆咁攬到實一實，隻手仲摷嚟摷去，好似想剝埋條褲咁。好彩防暴警察及時趕到，拯救咗衣衫不整兼露晒底嘅謝雲奴。
悶和喀麥隆攜手hea踢
呢場科、喀之戰都好有爭議性，因為佢哋和波就攜手出線，所以踢得好消極；尤其到補時階段，唔想輸嘅科特迪瓦喺自己禁區邊係咁搓波，和波都首名出線嘅喀麥隆就退守半場，hea到球證吹完場。呢啲非洲波可能真係蠱惑多，足智彩星期三原本開咗14場非國外，但最後得7場有得玩；足智彩解釋話，佢哋考慮完各方面嘅因素，包括高透明度賽事資訊、受注球賽嘅誠信同球賽嘅競爭性等，為咗保障自己同客戶嘅利益，最後決定唔開盤喎。
其實出年非國盃16支參賽球隊已經定晒（見附表），最爆冷係衞冕嘅尼日利亞冇得出線，佢哋星期三同南非踢成2:2，以8分只得A組第3名。
2015非國盃決賽周參賽隊伍
南非、剛果、馬里、阿爾及利亞、加蓬、布基納法索、喀麥隆、科特迪瓦、加納、幾內亞、佛得角、贊比亞、突尼西亞、塞內加爾、剛果民主共和國、赤道幾內亞（主辦國）
舉行日期：2015年1月17日至2月8日
識睇，一定係睇足英台【英波Live】：
http://soccer.appledaily.com
http://bit.ly/engballlive