時興「美魔女」，必瘦站（1830）亦都轉攻呢個市場。必瘦站主席歐陽江話，香港女人實在太自律，肥到要幫襯佢哋嘅女人已經唔多，市場有飽和迹象，加上𠵱家人人講美魔女，好多女人都希望每年去拜年嗰陣，畀人感覺冇老過，所以醫學美容生意有得做，好搵過纖體生意多多聲咁話！
歐陽江指，唔少人有錢又怕死，唔敢去整容，呢班人會就選擇做醫學美容，例如激光煥膚、去皺拉皮等等。而且整容係違反天意，佢暫時冇諗做呢瓣。
至於內地就依然有減肥市場，事關內地人冇咁自律，「食肥人」嘅快餐店近幾年喺內地又越開越多。歐陽江指，全中國肥胖人口達1.5億，每十個就有一個肥到要搵佢哋纖體，所以大有市場。醫學美容喺內地就主要幫正印擊退小三兼維持夫妻關係。講到尾，都係女為悅己者容。