筆者有位朋友A君，五年前喺香港quit咗歐資投行份工，走去上海，逐間證券行遞CV。結果俾佢喺間國企證券行搵到工，跟咗某位行內大佬，呢幾年撈到風生水起。筆者次次去上海都搵佢敍舊，見佢又買浦東豪宅又揸Benz，夜夜笙歌，不知幾風流快活。
滬港通搞到股市一鑊泡，實要打個電話上去向佢請教，指點一下迷津喇。A君話，其實滬港通呢場大龍鳳，行內都知發生乜事。
喺開通前，香港券商狂出唱好報告，佢呢邊亦唔執輸，互相鬥唱好。大家報告其實都係嗌口號，冇實質內容。目的只有一個，就是想𠱁對面啲錢過來，幫自己客仔甩手上啲貨，心照喇。
一句話講晒，大家都想當對方係儍仔。問題係，股市大家喺度真金白銀揾食，邊有咁多儍仔呢？結果就搞成咁。
喺上海灘打滾多年，A君話，「A股好玩好多」。
佢舉例話，大戶只要用少少錢就可以將一隻股份連續幾日拉停板，形成廣告效應，等啲散戶追貨。一年反覆操作幾隻，好容易就搵到大錢。咁好環境，大戶又點會放棄主場優勢，走嚟香港呢？
李可強