搖一搖玻璃飄雪球，就可以睇到球內白雪紛飛嘅美景；若然可以置身飄雪世界，呢個聖誕肯定唔再dry。利園購物區今年搞搞新意思。本月21日起，希慎廣場、利舞臺同利園外空地會分別擺放巨型雪球，市民只要捐50元，就可以走入聖誕球影相。
負責製作嘅凡天公司客戶經理Jackie話，因為想着重多啲同市民嘅互動，所以堅持喺戶外搞，而要做一個戶外嘅巨型聖誕球唔容易㗎，因為戶外「食風」、日曬雨淋，令雪球好易受摧殘，所以喺製作物料上落咗好多工夫，專門喺英國訂做只有0.8厘米厚度嘅PVC膠物料，球內裝飾都別具心思，北極熊、歐洲小屋內嘅松鼠等，都係向著名美國玩具公司Hansa特別訂購。
為免外國常用嘅雪粉「融咗就變得白濛濛」，令雪球表面變得模糊不清，所以佢哋將PVC膠削成不規則狀嘅「雪」，既輕且薄，風機吹起時有漫天飛雪效果，但又保持雪球通透。