港視（1137）噚日開台，講真睇咗一集《選戰》已經覺得港視冇得輸，完全令港劇向前大踏一大步。加上香港人忍咗TVB（511）咁多年，而家有個有誠意嘅新電視台開，點都會畀個機會佢嘅。雖然港視股價收市跌7%，不過話晒升咗咁多，相信都係趁好消息出貨吧。噚日有兩隻股隊得好甘，分別係由Juno老竇麥紹棠持有嘅中建富通（138），同埋旗下中建置地（261），前者跌一成，後者跌15%。主要原因係兩間公司公佈，曾經有人洽購中建置地呢隻殼，不過有關談判已終止。首先，中建置地上年用9億元，向母公司收購於遼寧發展商住物業嘅CCT Land（China）後，公司已經成為一隻內房殼股。要知道，內房銀根咁緊，內房殼是好搶手的。今次呢份通告，其實用另一個角度睇，即係話你聽，中建置地真係隨時賣得。
大家要知，股壇借發通告提高殼股叫價能力係慣常手法。上市公司表面出通告，向公眾公佈手上有幾多個人洽購；實際份通告唔係畀公眾睇，而係曲線同其他潛在買家講：其實好多人同我傾收購，手快有，手慢冇。
麥紹棠過去賣殼，都係賣畀啲有實力嘅公司，而家海爾（1169）前身就係由麥紹棠持有。中建富通早前折讓4%配股，好可能就係為賣盤做準備，率先作出資產調配。反正已到談婚論嫁階段，其實可以趁跌買入一博。
Fifi
http://www.facebook.com/lovefrystock
本欄逢周二、四刊出