香港原來已經好中立，因為喺好多其他地方睇體育節目，係非常有立場。徐緣就話︰「我以前試過睇奧運，喺香港聽嘅評述，同我飛去英國聽到嘅評述差好遠！要睇你用邊個本位去睇！」Keyman非常認同︰「其實運動喺好多國家嚟講，唔係一件好中立嘅事嚟o架！」
Keyman都試過一次奇妙經歷︰「後生時去日本，喺電視睇咗世界田徑錦標賽，嗰時有個400米比賽，我心諗，原來日本選手咁勁？唔係仲有米高莊遜咩？但係好少見佢，淨係見到日本選手。到衝咗終點，呢個時候介紹呢位日本選手，原來只係第7名，即係其他選手都係0報道！」
事實係日本電視台用自己嘅鏡頭，淨係拍呢位日本選手作報道︰「如果你唔知，好似我咁，又唔識聽，仲以為佢係第1名！佢哋唔理其他人，淨係想build up一個人，或者係自己人！」
Keyman繼續講到興起︰「南韓都一樣呀，南韓世界盃嗰陣，highlight淨係不停重播自己啲入波！」擺到明攞威，又唔怕畀人話偏頗，咁都得？
重播威水場面好威威！今晚11:00《亂噏24》足本版！