毛里裘斯籍騎師田泰安今季表現大跌Watt好冇運，由佢輸完嘅馬，一隻輪住到一隻換人變身，今晚第二場先有「樂在其中」換郭能開齋，第三場四班1200米，再有摩廐「赤壁武士」由雷神接手勝出。
「赤壁武士」上仗心律不正常大包尾，今仗卻飛到馬到，初跑谷草後上一衝過晒，WP着晒綠燈，落飛黨中到應一應，同樣着綠燈起飛之「仁愛之友」跑第二，42倍啡燈Q畀落飛黨撈埋，好像一早知道「赤壁武士」的表現不會再受健康影響；呢場季軍則係大冷門「愛頑皮」。
「赤壁武士」馬主田啟文唔係星爺前愛將田雞，而係田北俊個仔。上周三夜馬田北俊女兒田啟安之「盈威勇士」由雷神建功，田啟安有拉頭馬，但呢晚「赤壁武士」開齋，田北俊、啟安及啟文都冇出現。田少冇咗政協做，或者一時間仲未完全釋懷，不過一對子女一個禮拜內輪流贏馬，相信佢知道後，心情應該比之前好咗好多。