【《蘋果》巴黎專訪】入行十年，是一個里程碑，25歲的文詠珊（Janice Man）離開黎明公司後，加盟黃柏高的太陽娛樂，同時又決定自己開工作室做老闆，雄心壯志。藝人大多慣了被寵被照顧，換轉角色無疑有一定難度，幸好Janice從小獨立自主，訓練有素，「爹哋媽咪成日話我係老人精，佢哋鬧交我會做和事老，同埋我細佬細我6歲，所以揀學校工作事無大小都會搵我。」自14歲起走進社會大學，Janice一直對自己要求甚高，至今依然不敢鬆懈，「我唔會對自己評分，外面嘅世界咁大，仲有好多嘢想做想學。」
撰文、造型：鄧卓嶽
攝影：周樂恆
化妝：Vinci Tsang of vcwmakeup
髮型：Matt Chiu of Xenter
服裝提供：I.T.
猶記得早年曾與Janice合作，舊公司對她儼如溫室小花，不論妝、頭、服飾都經過濾再過濾，今次巴黎重遇，與她遊遍名勝景點，拍攝外景耗時又麻煩，藝人通常落閘say no，難得Janice沒有半句怨言，話事權在自己手中，的確截然不同，「我唔敢講自己經歷咗好多嘢，但係試過又學過，起碼𠵱家我好清楚自己要啲乜。」前老闆黎明獨具慧眼，5年來對她呵護有加，就算約滿前依然為她排滿工作，「佢好似一個大哥哥，無論工作私事我都會同佢分享。」好老闆難求，Janice從黎明身上亦學懂了這個道理，「首先我唔會當自己係老闆，我都係打工咁嘅心態，要成功要信任背後嘅團隊。本身我比較執着好多細位，要求高，雖然我係山羊座，不過內心其實非常處女座，所以要學識得慢慢放手，如果唔係身邊嘅人都會好辛苦。」
西太后認得我
數年前開始，Janice一心轉戰電影圈，目標明確，由11年的《報應》、《大追捕》中一人分飾兩角、陳果的《那夜凌晨，我坐上了旺角開往大埔的紅Van》，至年尾上映的《赤盜》，貴精不貴多的產量，鋪陳得如此小心翼翼，足見她揀選劇本的認真。「Fashion week之後再會留多一個禮拜，客串一套電影叫做《巴黎假期》，同古天樂同埋郭采潔合作，入面角色都幾特別，有好多紋身、幾rock嘅造型。」愛上做戲的快感，今年更將首次挑戰公仔箱，「我要離開香港直至年尾，到內地拍攝電視劇，有好多準備功夫，因為第一次拍年代劇，套劇叫《畢業歌》，講述抗日戰爭嘅時期，今次係第一次要用普通話講對白，有成三、四十集嘅劇本，專誠搵咗普通話老師上堂，但係始終唔係first language，顧住發音標準又怕顧唔到表演，所以感覺好大壓力。」
今次歐洲fashion week之行，其實亦是受時裝雜誌邀請擔任客席editor，走勻大小騷場，比起以往休閒睇騷更為深刻，「最深刻係Jean Paul Gaultier最後一場ready-to-wear，好震撼、好特別，真係好似一場戲咁。好開心睇到，但係又有啲可惜。除咗睇騷仲識咗好多厲害嘅editor同designer，有次喺後台見到Vivienne Westwood，之前同佢見過一次，佢竟然仲叫得出我個名，真係好勁。」
等待愛情降臨
吸金力超強的Janice，工作行程密不透風，單是這數月，往來日本、紐約、歐洲等地開工，近日又要暫居上海拍劇，僅餘在港的時間不是拍廣告就是出席活動，令她份外想念家的感覺，「每次返香港都特別珍惜，尤其係見到家人同埋我隻狗仔，食餐飯傾吓偈已經好滿足。」在家裏做慣管家婆，自認有做leader的天性，「唔止屋企人，就算朋友圈子都係我去connect每一個人，我最鍾意將一班陌生嘅人group埋一齊。」
現時工作毫無透氣位，不過Janice還是非常期待愛情的降臨，「女仔拍拖嘅時候做嘢變得好有衝勁，但係冇嘅話又唔代表自己唔夠好。以前嘅我太過愛情至上，如果𠵱家遇到我會識得balance。呢一刻我最愛我嘅工作，呢個年紀要衝要跑，做晒我想做嘅嘢先。」打穩演藝事業的基礎後，心思細膩，下一步還有更多夢想要實現，「我最鍾意高踭鞋，好想可以有自己嘅品牌，不過唔想馬虎了事，做到高質素成本一定好高，我會諗人哋點解要買你先？另外我仲想開餐廳，不過都係將來嘅事，我會step by step將佢實現。」
Keep住最佳狀態
「後生就係本錢！」這不是筆者的見解，而是攝影師為Janice拍攝時的親身體驗，儘管她長期開工，高清鏡頭下仍可近乎零毛孔，女神之名實至名歸。貪靚不免要下些苦功，正如Janice於巴黎期間，就算再忙都要落街跑步，看似嬌小柔弱，原來是名運動健兒，永遠處於充好電的作戰狀態，難怪深得廣告商愛戴，機會的確是留給有準備的人。
更多精采時尚內容，盡在 http://add.appledaily.com。