財金界名人平時應酬多，唔小心食多咗，身形好易走樣，近年就有唔少圈中人去做gym減肥瘦身。唔講唔知，63歲嘅港交所（388）主席周松崗原來都有做開運動，仲要係每日做成個鐘頭帶氧運動，玩齊滑雪機同單車機。但華華噚日見佢依然肥嘟嘟，做運動嘅效果唔多顯著喎。
可能周主席都知自己講出嚟冇乜說服力，自嘲話「我日日做gym㗎，你唔好睇我肥屍大隻。」華華見佢每日做運動都減唔到肥，忍唔住搵來幫好多財金名人減肥健身嘅「風之子」杜恆霖幫佢解開呢個「不瘦降之謎」。
杜恒霖喺多年前已經開辦武術健身中心，佢話，其實好多人都會做極運動都減唔到肥，主因不外乎食量多過消耗量，體能唔足夠去燃燒脂肪，年紀大，新陳代謝減慢亦有影響。
佢舉例話，一般50歲左右嘅男人，初學健身，每星期兩次，每次一粒鐘，維持兩個月已經會減到幾磅，之後隨住體能提升，就可以開始減低脂肪比例，加埋健康飲食，磅數自然慢慢下降，重點係要持之以恒，好多人就係做唔到呢點囉。